Иринцеева-Огдо Евдокия Семеновна
Барыта алҕас этэ
БАРЫТА АЛҔАС ЭТЭ
Биир үтүө күн Маайыс, тугу да гынара суоҕуттан мирк диэннэригэр киирэн эрэрэ даҕаны, ылларардыы ылларбыта. Билигин кэлэн кэмсиммит да, кэмсиммэтэх да иһин, хайаахтыай, аныгы олох абытайдаах дьалхаана буоллаҕа Быһата, Маайыс биир уоллуун букатын алҕас билсибитэ.
Тоҕо эбитэ буолла, Маайыс курдук дьулугур үрдүк уҥуохтаах, көбүс-көнө атахтардаах, намылыйбыт уһун суһуохтаах, аныгы оҕо диэтэххэ, косметика диэни билбэтэх ыраас-кэрэ сэбэрэлээх кыыс сахаҕа да элбээтэ эбээт? Биһиги кыыспыт көстөр дьүһүнүнэн киһи хараҕа хатанар, дэҥҥэ мичийэн ыллаҕына сандаарыс гына түһэр ыраас хааннаах, хобо чуораанныы лыҥкыныыр куоластаах, синньигэс биилинэн оонньоон, курбуһаҕынан долгулдьуйан ааһар ураты таһаалаах буолан, оннооҕор, араас «мисскэлэргэ» мэлдьи батыһа сылдьан ыҥырар идэлээхтэр.
Ол эрээри Маайыс баҕар, Дьокуускайга үөрэммэтэх буолан буолуо ханна да кытта сатаабат. Питер курдук киэҥ дьалхааннаах сиринэн кэрийдэр да, үөрэх туһугар муннукка ытаабыт, атыҥҥа аралдьыйбатах уонна эбиитин сэдэх идэлээх буолан, салалта тус ыҥырыытынан Сахатын сиригэр үлэлии кэлбитэ үс эрэ сыл буолла. Үлэлиир сирэ дьоһун сир, саха киһитэ иҥэн-тоҥон уһуннук тохтоон үлэлээбэтэх, кытаанах хонтуора. Онно кини, үлэттэн ордон, алтыһарга-сэлэһэргэ билсиэн-көрсүөн сөптөөх эдэр ыччат эйгэтэ суох буолан, хаайтаран, ханна да сылдьыбат кыыс биирдэ, быыс булбучча, миркэҕэ киирбитэ. Ол да иһин эмискэ хараҕа аһыллыбыт буолуон эмиэ сөп.
Виталийдыын дьикти баҕайытык билсибиттэрэ. Туохтан эрэ төрүөттэнэн уол маатыралаан ыһыллаҥната олороругар түбэспитэ. Үөхсэ аҕай олордоҕуна, арай приватка Маайыс «тоҥсуйбута» уонна боростуой баҕайытык ыйытан барбыта. Кини дьиҥэр да оннуга. Кыыс, бу үлүгэрдээх харса-хабыра суох, дьөрү да дьэбир тыллаах-өстөөх туох киһитэ буоллаҕай диэн таах, уоскутаары эрэ буолбатах, биир үксүн дьиктиргээн, билэ сатаан бастакынан тыл көтөхпүтэ Виталий буоллаҕына, сөрү-сөпкө наардаабыт курдук суруйар, хайдахтаах да тылынан быдьардык саҥардаҕына холку баҕайытык тэтимин ыһыктыбакка хардарар, эбиитин өссө, үөрэтэ сатыырга дылытык, сэмэлиэх кэриҥнээх дьикти «саҥалаах» чоп курдук чобуо кыыһы, кырдьыга, бастаан абааһы көрбүтэ, онтон улам кэпсэттэҕин аайы сэҥээрэн испитэ.
Күннэтэ кэпсэл ырааппыта, аны иккиэн күүтүһэр, хаһан чатка киирэллэрин болдьоһор буолбуттара. Бу икки бэйэ-бэйэлэрин билсибэт киһи тугу сэлэһэллэрэ буолуо диигитий? Сэгэриэм, солуута да суох, суолтата да чычаас быыкаа сонун сыыһа, түбэһиэх туох эмэ айымньы да буоллун, күҥҥэ көстөр бары эгэлгэ туһунан таах кэпсэтии, санааны атастаһыы эдэр дьону балачча билсэллэригэр күөртээбитэ эрэ быһыылааҕа.
Сарсыарда, сүүрэн кэлээт, Маайыс:
Доҕоор, мин ойдум, аны 23 чааһынан кэлээ инибин, диэт, ыстанан хаалара.
Оччоҕо уол ити кэмҥэ суоттанан, кыыһын кэтэһэ таарыйа, туох баар күннээҕи үлэтин бэрт түргэнник бүтэрэ охсоро. Онтон Маайыс кэлэригэр тугунан эмэ булгуччу соһутаары, интернети биир гына «кэрийэн», итини-маны ааҕан илистэ быһыытыйара. Итинник сылаарҕаан олордоҕуна эмискэ кыыс «тиийэн» кэлэрэ, аҕыйах тылынан ханна сылдьыбытын, тугу истибитин тэбии охсоро. Маайыс уол куруук чатка баарыгар үөрэнэн да хаалбыта. Кининэн сирэйдээн, куруук кэтэһэр-күүтэр киһилээх буолан, сарсыардаттан бэрт тиэтэлинэн компьютерын холбуу биэрэрэ, Виталий баарын көрөөт, үөрүүтүттэн мичээрдээн ылара.
Биирдэ политиктар тустарынан, туохтан сылтаммыта буолла, мөккүһэн турбуттара. Ханнык эрэ түгэҥҥэ, кыыс собус-соруйан уолу кыынньаабыта, букатын да дьиҥ иһигэр бэйэтэ санаабатын курдук төттөрү куолулаан үтэн-анньан турбута уонна кини тугу диирин долгуйа күүппүтэ. Соһуйуон иһин, Виталий бэрт тулуурдаах уонна олохтоох тыллаах буолан биэрбитэ. Кырдьыга, кыыс, кинини эмиэ кыыһыран, маатыралаан-үөхсэн да турдаҕына соһуйбаттыы бэлэмнэммитэ эрээри, бу сырыыга тоҕо эрэ оннук буолбатаҕа.
Итинтэн ыла Маайыс кыра-кыралаан уолу чыычылыыр идэлэммитэ, кырдьык-хордьук уол сэрэйбэтин курдук араастаан дьээбэлиирэ уонна, соһуйуон иһин, түмүгэр бэйэтэ наһаа астынара, ис-иһиттэн долгуйа үөрэрэ. Уол ол курдук өйдөөҕүн, олохтоох тылын, наһаа тобуллаҕастык, хайдахтаах да киһиэхэ чугастык, түргэнник тиийэр гына наҕыллык быһаарарын кыыс сөбүлээбитэ. Биирдэ кини үлэтигэр ыктаран, санаата оонньоон, хомойон, ытыахча да буола сыһан, эмиэ приватка киирэн Виталийга үҥсэргээбитигэр, оруобуна били урут эһэтэ оҕонньор уоскутарыныы, наллаан сүбэлээн, тугу эрэ холобурдаан күллэрэн, устунан таһы-быһа умуннаран кэбиспиттээх. Онуоха чэпчээбит, санаатын дьайҕардыбыт кыыс соһуйан саҥа аллайбыта:
Сэгээр, хата, эн туох эрэ психологкын ээ, быһыыта? Сеанскар төһө харчыны ылааччыгыный? диэн күлбүттээх.
Уол оонньууну тута өйдөөн:
Уу, хотуой, мин өҥөм наһаа сыаналаах, кырдьыаххар да диэри төлүүрүҥ биллибэт, диэн төттөрү хаадьылаабыта
Ити тухары дьиҥ-дьиҥэр кинилэр үчүгэйдик билсэ иликтэрэ. Онтон арай биир күн Виталий чуолкайдаһан турбута.
Бэйи эрэ, эн аатыҥ-суолуҥ кимий? Мин буоллаҕына, инженербин, кэргэним суох, таптыы сылдьыбытым диэн баһаам. Билигин көҥүл-босхо хаамабын эрээри, доҕор кыыһым суох Билсэбит дуо?
Маайыс күлбүтэ, билсибиппит ырааппыт курдук эрээри, кырдьык да билсэ илик эбиппит диэн хардарбыта. Хаартыскаларын Виталий утуу-субуу: «Лови!» дии-дии, ыытан-кутан испитэ. Маайыс мониторун тобус-толору толорбут уол мөссүөнүн наһаа сөбүлүү көрбүтэ, ордук өйдөөх баҕайы харахтарын. Бу сайын, арааһа, сөтүөлээн тахсыбыт быһыылаах, кытылга турар, оттон бу кустуу сылдьан түспүт, бу мээчиги хабаары охтон аҕай эрэр, бу отоннуу сылдьар, арааһа, сүрэҕэлдьээбит дуу, тоҕо эрэ сыппыт эҥин Хайа, бу хайыһардаан дайбыт, бу хайа эрэ кыыстыын таһырдьа, мууска кутуллубут катокка, хаҥкылаан сырылаппыттар.Үчүгэй да баҕайы! Оттон бу бүүс-бүтүннүү бурдук буолан тугу эрэ буһара сылдьар, бу үҥкүүлүү сылдьар, бу даачаҕа дуу, тыаҕа дуу, хаар күрдьэр быһыылаах, бу компьютерыгар киириэх айылаах тугу эрэ көрөн аҕай олорор.
Оттон кыыс бэйэтин киэнэ хантан кэлиэй? Инженер уол курдук кини компьютеры хантан билиэй? Санаа хоту талбытын ыытар кыаҕа суоҕа, кими эмэ көрдөһүөн кыбыстара. Ону, инньэ диэн быһаарбытыгар, Виталий тоҕо эрэ ылыммыта, баалаабатаҕа.
Ити курдук үс ыйы быһа суруйсубуттара. Онтон биирдэ уол соһуйбут курдук суруйбута:
Маша, оттон, хата, төлөпүөн диэн баар дии? Давай, я позвоню?
Иккиэн күлбүттэрэ, кыыс тута төлөпүөнүн биэрбитэ, уол кини куолаһын истээт «бүтээхтээбитэ».
Кини туруупкаҕа иһиттэҕинэ, Маайыс наһаа сэмэйдик, намыыннык, тарда соҕус унаарытан саҥарара, биир кэм холку бэйэлээҕэ уонна долгуйарын даҕаны букатын биллэрбэккэ кыана туттар кытаанах соҕус быһыылааҕа. Виталий маннык сылаас уонна нарын куоластаах кыыһы, кырдьыга, биирдэ да көрсө, истэ илигэ. Туруупканы тутан олорон хараҕын симнэҕинэ, букатын билбэт кэрэчээнэтин мөссүөнэ субу устан кини иннигэр көстөн кэлэрэ. Санаатыгар, Маайыс кыып-кыра, хаап-хатыҥыр уонна төөп-төгүрүк оҕолуу мыттайбыт сирэйдээҕэ, кыбыста быһыытыйбыттыы сабыччы көрбүт кыараҕас харахтардааҕа, кыргыылаах баттаҕын сымнаҕас тыал ыһан үргэҥнэтэрэ. Уол сүрэҕэ дьиктитик мөхсөн, түөһүн иһэ сып-сылаастык илгийэн, кими эрэ наһаа күүскэ таптыан, туохтан эрэ көмүскүөн баҕарар ураты иэйиигэ куустарбыта.
Оттон Маайыс, Виталийы хаартыскатынан инники көрбүт киһи быһыытынан, улам-улам сөбүлүүрэ күүһүрүөххэ дылыта, арай, көрсүөх диэтэр эрэ кини сибилигин да сүүрүөх курдук туруктааҕыттан симиттэ санаан, көрбөккө да олорон, имнэрэ тэтэр гына түһэллэрэ.