Разумом свыше просвещен быв и повинуяся воли Божией и Владычицы Богородицы, уготова святитель Алексий вся потребная монастырю и благослови келейника своего преподобного Варлаама, да усмотрит место для обители. Мы же, отче Варлааме, о таковом твоем избрании дивимся и сице тебе поем: Радуйся, узкими вратами за Господом последовавый; Радуйся, богатства мира сего и славу его возненавидевый. Радуйся, обители иноческой основателю; Радуйся, монахов добрый наставниче. Радуйся, святителя Алексия друже и собеседниче; Радуйся, преподобного Сергия славный сподвижниче. Радуйся, в келии великого святителя земли Русския воспитанный; Радуйся, святительским к тебе дружеством не возносивыйся. Радуйся, подвижниче, благодатию Божиею приосененный; Радуйся, от людей российских с любовию прославляемый. Радуйся, Церкве Русския украшение; Радуйся, душ наших радование. Радуйся, преподобне Варлааме, земли Серпуховския преславный чудотворче.
Сила Вышняго благодатию осени тя, преподобне Варлааме, егда обретше место красно в земли Серпуховстей, услыша тамо звон велик, гремения сосудов, и помысли, яко ту подобает монастырь поставити и воротися возвестити о сем Алексию святителю, воспевая радостно Богу: Аллилуиа.
Имуще в памяти бывшее тебе знамение, блаженне, приял еси послушание от святителя Алексия еже быти строителем монастыря, обаче смотрением
Божиим пал еси, яко мертв. Видев же сие, возопи святитель ко образу Владычицы Богородицы и по слову Ея взем за руку преподобного и абие воста Варлаам, плача велми о бывшем видении. Сего ради любовию подвизаеми, воспеваем тебе таковая: Радуйся, дивного и страшнаго видения удостоенный; Радуйся, прежде отшествия своего тайну видения сего никомуже открывый. Радуйся, славным явлением Пресвятыя Богородицы обрадованный; Радуйся, дом Владычицы Богородицы воздвигнувый. Радуйся, покровом Царицы Небесныя осененный; Радуйся, в трудех на благо обители от Нея благословленный. Радуйся, земли Серпуховския вскоре достигнувый; Радуйся, вертоград духовный зде насадивый. Радуйся, на месте сем в подвизе иночества поживый; Радуйся, оное молитвами своими святое соделавый. Радуйся, добрый делателю винограда Христова; Радуйся, благодати Духа Святаго сосуде избранный. Радуйся, преподобне Варлааме, земли Серпуховския преславный чудотворче.
Бурею помыслов смущаем был еси, преподобне, о недостоистве своем и немощи исполнити благословение, како будеши воздвизати обитель имени Владычицы Небесной, купно же и памяти святителя. Темже укрепляем и одобряем дивным видением, уразуме, яко Сама Пречистая Дева благословляет устроити храм и обитель во имя Введения Ея во храм, Ейже со умилением взывал еси, отче и славил еси Бога, поя Ему: Аллилуиа.
Слышав святитель Алексий, яко преподобный Варлаам, разуме удобное место для обители от Бога указанное, сам прииде во град Серпухов и на том же месте в нощи глас услыша, повелевающ зде монастырь поставити и абие повинующеся сему, повеле церковь заложити, Варлаама же строителем нарек. Таковому содружеству твоему с великим угодником Божиим Алексием дивимся и сице тебе глаголем: Радуйся, любовь и преданность совершенную святителю Алексию явивый; Радуйся, строителем обители Владычней им поставленный. Радуйся, сотаинник ему верен бывый; Радуйся, содружество с ним до кончины своея сохранивый. Радуйся, благословение святителя Алексия исполнивый; Радуйся, град Серпухов обителию дивною украсивый. Радуйся, церковь чудную во имя Введения во храм Пресвятыя Девы в ней устроивый; Радуйся, в церкви сей со ученики твоими радостно Богу воспевавый. Радуйся, земли Серпуховской благодатный крине; Радуйся, российских иноков славо. Радуйся, кротости и смирения исполненный; Радуйся, отче милостивый и благодатный. Радуйся, преподобне Варлааме, земли Серпуховския преславный чудотворче.
Боготечная звезда явился еси во граде Серпухове, отче Варлааме, путь заповедей Господних показуя всем хотящим иноческое житие проводити и добре управлял еси тринадесять лет обителию Владычней. Темже убо и нас, во тьме страстей пребывающих, сиянием добродетелей твоих озари, да возопиим о тебе с благодарением Богу: Аллилуиа.
Видевше тя братия обители Владычныя дивнаго строителя и попечителя о спасении Богом врученнаго тебе стада, церкви бо и келии созидал еси, их же иконами украсил и вся в монастыре яже на потребу добре устроил еси. Таковым неусыпным трудам твоим дивящеся восхваляем тя сице: Радуйся, обители Владычныя богомудрый устроителю; Радуйся, храмов Ея благоукрасителю. Радуйся, уставы отеческая во обители утведивый; Радуйся, в иночестем житии многих братий укрепивый. Радуйся, подвизающихся в ней славословити Господа и Матерь Божию научивый; Радуйся, добре стадо тобою собранное на спасение наставивый. Радуйся, житием твоим образ инокам явивый; Радуйся, к Небесному Отечеству их руководивый. Радуйся, монашествующих искусный водителю; Радуйся, обители твоея присный пред Богом предстателю. Радуйся, крест свой терпеливо носивый; Радуйся, образ совершенства духовного в себе явивый. Радуйся, преподобне Варлааме, земли Серпуховския преславный чудотворче.