Тропарь благоверному царевичу Димитрию Угличскому и Московскому, глас 4
Царскую диадиму обагрил еси кровию твоею, богомудре мучениче, за скиптр Крест в руку приим, явился еси победоносец и жертву непорочну Владыце принесл еси себе: яко бо агнец незлобив, от раба заколен еси. И ныне, радуяся, предстоиши Святей Троице, молися о державе сродников твоих богоугодней быти и сыновом российским спастися.
Ин тропарь, глас 2
Яко благочестиваго корене боголюбивый произыде плод, яко агня незлобиво, неповинно во младенстве заклан бысть от властолюбца вкупе и злаго раба. Тем, яко златыми крылы, душевною чистотою и младенческим незлобием к Небесней высоте возлетел еси, страстотерпче Димитрие. И ныне кровь твоя от земли тайно вопиет к Богу, яко Авеля праведнаго. Сего ради покланяемся верою ти, славяще прославлынаго тя Бога, Егоже моли стране нашей богоугодней быти и сыновом русским спастися.
Ин тропарь, глас 1
Всеоружеством Духа благодати вооружен был в необорим столп и утверждение отечеству своему показася, яко агнец незлобивый, от врага неправедно заклан был и в жертву непорочну Господеви принесеся. И ныне дар благодати от всех Подвигоположника прием, источаеши всем исцеление, достохвальне благоверный царевичу княже Димитрие. Слава Восприимшему тя от земных в Небесная, слава Действующему тобою всем исцеление.
Ин тропарь, глас 3
Днесь вельми хвалится царствующий град Москва, имея в себе праведныя твоя мощи, благоверне царевичу Димитрие, яко цвети благоуханнии, пребываеми во святем храме, просвещение подают душам и телом нашим. Тем радостно тя восхваляем, и честное пренесение мощей твоих верно почитаем, и молим тя: моли Христа Бога даровати нам велию милость.
Ин тропарь, глас 2
Яко благочестиваго царскаго корене боголюбивый произыде плод, яко агня незлобиво, неповинно во младенчестве заклан бысть от властолюбца, вкупе же и от злаго раба, тем яко златыми крилы душевною чистотою и младенческим незлобием к Небесней высоте возлетел еси, Димитрие, и ныне кровь твоя от земли тайно вопиет к Богу, яко Авеля праведнаго, и сего ради покланяемся верою твоих мощей раце, из неяже реки чудес изливаеши приходящим ти с верою и любовию целующим многоцелебныя твоя мощи, славящим прославльшаго тя Бога, Егоже моли, державный страстотерпче Димитрие, православным сыновом русским спастися.
Кондак, глас 8
Возсия днесь в славней памяти твоей верным веселие яко бо доброрасленный грезн прозябл еси и Христу красен плод принесл еси; темже и по убиении твоем соблюди тело твое нетленно, страдальчески обагренное кровию. Благородне святе Димитрие, соблюдай отечество твое и град твой невредим, тому бо еси утверждение.
Ин кондак, глас 8
Светило пресветлое явися днесь божественная память твоя; богодарованная ти чудеса, яко реки, от всяких многоразличных недуг подаеши исцеление с верою призывающим тя, созывая нас к похвалению прославляющаго тя Бога. Егоже моли, страстотерпче Димитрие, мир мирови даровати, от видимых и невидимых враг православныя люди невредимы сохранити, да зовем ти: радуйся, ты бо еси утверждение граду нашему.
Ин кондак, глас 4
Яко пресветлая звезда явился еси днесь в царствующем граде Москве, благоверне царевиче Димитрие, сияя праведными своими мощами. К нимже притекающе, исцеления дар приемлем и глаголем: радуйся, всекрасне душею, благородне Димитрие, яко приял еси от Бога велий сей дар и венец нетленный.
Величание
Величаем тя, святый благоверный царевиче Димитрие, и чтим святую память твою, ты бо молиши за нас Христа Бога нашего.
Благоверному царевичу Димитрию, Угличскому и Московскому, молятся о прозрении слепых очей.
Молитва преподобному Димитрию Прилуцкому, Вологодскому
из акафиста
О священная главо, предивный чудотворче, преподобие и богоносне отче наш Димитрие! Усердно припадающе к тебе, молимся: яви нам, смиренным и грешным, многомощное твое заступление. Се бо грех ради наших не имамы дерзновения ко Господу, просити Его даров, нам благопотребных, но тебе, молитвенника к Нему благоприятнаго, предлагаем и просим: испроси нам у благости Его вся, яже на пользу душам и телесем нашим: веру праву, надежду несомненну любовь нелицемерну, во искушениих мужество, в злостраданиих терпение, в молитвах постоянство, в благочестии преуспеяние, вожделенное здравие, земли плодоносие, воздуха благорастворение, дожди благовременны, житейских потреб довольство, мир во днех наших и благословение свыше на вся благая дела и начинания наша, и да не во зло обратим дары Его, но в славу имене Его святаго и в прославление твоего о нас ходатайства. Испроси, угодниче Христов, у Царя царствующих и Господа господствующих стране нашей Российстей тишину и благостроение. Не забуди, чудотворче святый, милостивно присещати град твой и обитель твою, и вся грады и веси страны нашея православныя, сохраняя и соблюдая их молитвами твоими от всякаго зла. Помяни всех, веру и любовь к тебе имущих, имя твое молитвенно призывающих и на поклонение мощам твоим святым приходящих и вся во благих прошения их милостиво исполни, осеняя их свыше святоотеческим твоим благословением. Ей, святче Божий! Не лиши и нас грешных твоего многомощнаго заступления, но сподоби нас кончину жития благую улучити и Царствие Небесное унаследити: да воспоем и прославим дивнаго во святых Своих Бога нашего, Отца и Сына и Святаго Духа, во веки веков. Аминь.