Тропарь блаженной Любови Рязанской, глас 5
Любовью наречена была еси во Святом Крещении, любовь Христову познала еси, в житии дерзновение велие стяжала еси, темже к тебе усердно прибегаем из глубины сердец наших взывающи: молися убо ко Господу, Любовь блаженная, богомудрая, даровати мирови мир и душам нашим велию милость.
Кондак, глас 3
Святителем Христовым Николаем исцеленная и на служение Богу и людем имже благословенная, крест свой юродства с любовию до конца пронесшая. Святая блаженная Любовь, не остави нас, почитающих святую память твою, ныне предстоя в лике святых престолу Пресвятыя Троицы, молися о благоденствии отечества твоего и о спасении душ наших.
Величание
Ублажаем тя, святая блаженная мати Любовь, и чтим святую память твою, ты бо молиши за нас Христа Бога нашего.
Молитва святителю Иоанну, митрополиту Тобольскому
из службы
О святителю Христов Иоанне, Божию престолу со святыми предстояй! Ты еси отец наш любвеобильный и молитвенник наш теплый. Умоли Господа Бога, да подаст нам коегождо потребно полезная: скорбящим утешение, немощным здравие, заблуждшия да наставит и обратит на путь покаяния, распри и раздоры умирит, неведущия Христа люди на путь спасения да обратит и всех нас единением духа и любве в Единей Святей Своей Церкви соединит, да сохранит нас от глада, града, труса, потопа, огня, меча, междоусобныя брани и напрасныя смерти, наипаче же от искушений, облежащих нас в жизни сей, да дарует нам мирное пожити зде житие и веру свою православную невредиму соблюсти. О святый угодниче Христов, архипастырю предобрый, молитвенниче наш неусыпный! От юности всего себе Богу посвятив, равноангельное житие стяжал еси, исполнен бе радости духовныя, яже озаряше светлость лика твоего и сердца верных утешаше, поистине бе светильник горяй и светяй, святолепно пожив, от Господа сподоблен бе дара прозрения, время кончины своея предуведа, моляся пред образом Пречистыя Богородицы, коленопреклоненне преставися; ныне проси Ю о нас, да будет нам Покровительница в сей многотрудней жизни и в час кончины нашея да умолит Всеблагаго Господа сподобитися нам в лице благоугодивших предстати престолу Его и восхвалити в Троице славимаго Бога, Отца и Сына и Святаго Духа, во веки веков. Аминь.
Тропарь святителю Иоанну, митрополиту Тобольскому, глас 8
Наставниче благочестия, сиротствующих питателю, скорбящих утешителю, недугующих врачу безмездный, душею страждущим скорый помощниче, теплый молитвенниче ко Господу, святителю отче Иоанне, моли Христа Бога спастися душам нашим.
Кондак, глас 2
Явился еси во тьме неведения пребывающим просветитель, вдов и сирот утешитель, дивный врач немощствующих, младенцев и отроков наставник, родителем же пресветлое радование, святителю отче Иоанне, моли Христа Бога, подати стране нашей в вере утверждение, воинам на враги победу и одоление, людем же своим велию милость.
Величание
Величаем тя, святителю отче Иоанне, и чтим святую память твою, ты бо молиши за нас Христа Бога нашего.
11/24 июня
Преподобного Варнавы Ветлужского (1445).
Перенесение мощей преподобного Ефрема Новоторжского (1572).
Иконы Божией Матери, именуемой «Достойно есть» («Милующая») (X).
Молитва преподобному Варнаве Ветлужскому,
чтомая в Троицком соборе града Варнавина Костромской епархии
О всеблажнне отче преподобне Варнаво, теплый заступниче и помощниче с верою призывающим тя! Избави нас молитвами твоими ко Господу от всякаго обстояния бесовскаго. Изми нас, окаянных рабов твоих, о чудотворче Варнаво, от уст пагубнаго змия, ищущаго пожрети нас и свести во ад живых. Прости нас, отче, елико согрешихом ти, исторгни нас от греха и всякия напасти, приходящия грехов ради наших. Подаждь душам нашим утешение, всади в сердца наша страх Суда Божия, избави нас от врагов наших видимых и невидимых, тебе бо имамы тепла молитвенника и заступника, еже в бедах сущия и в грехи впадшия. Ты бо явися столп благочестия, воздержания правило, смиренномудрия образ, целомудрия наставник, убогим и сиротам заступник и хранитель прибегающим к тебе. Кто убо по достоинству может похвалити равноангельное твое житие и кто может изчести твоих трудов подвиги и слезы ко Господу? Воистинну яко солнца светлейши возсия твоя исправления, ревнитель бо бысть всем святым, преподобных и праведных учитель духовный и всем, призывающим тя, молитвенник ко Пресвятей Троице. Ты, яко мир оставил еси и яже в мире, и нас приведи ко Господу молитвами твоими, отче честнейший, да и мы сподобимся вечных благих, ихже наслаждаешися: Небесныя славы, желаемаго Иисуса Христа и сладчайшаго Владыки и Господа всех. Емуже подобает всякая слава, честь и поклонение, со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.