Молитва вторая,
чтомая в Кирилло-Белоезерском монастыре Вологодской епархии
О богоблаженне и преподобне отче наш Кирилле, пастырю добрый и истинный строителю винограда Христова, отцем славо, преподобных сподвижниче, праведным совсельниче, иноков наставниче и общаго жития совершителю, ныне на небеси Святей Троице со всеми святыми предстояй! Молимся тебе при гробе твоем, яко чадолюбивому отцу нашему, и от сердца с любовию вопием: о преподобне отче Кирилле, помяни стадо твое, еже мудре собрал еси, и соблюди твоими молитвами Богом дарованную ти паству, и не презри нас чтущих пречестную и многорадостную твою память: сохрани и соблюди нас от всех враг видимых и невидимых; очисти наша согрешения, и отжени от нас облак страстей, и просвети наши душевныя очи; гугнивый язык наш исправи, смысл очисти и разум освяти; прииди посреде нас невидимо, и от всех нас моления Богови возсылаемая приими, и донеси сия ходатайственне всех Творцу и Избавителю, в Троице Святей покланяемому Богу нашему, яко да согрешений наших оставление получим, благодатию и человеколюбием Господа нашего Иисуса Христа, с Нимже Отцу и Святому Духу слава подобает, ныне и присно и во веки веков. Аминь.
Тропарь преподобному Кириллу, игумену Белоезерскому, глас 1
Яко крин в пустыни давидски процвел еси, отче Кирилле, злострастия терние искореняя, и собрал еси в ней ученик множество, страхом Божиим и учением твоим наставляемых, ихже и до конца, яко чадолюбивый отец, не оставил еси, посещая, да вси вопием: слава Давшему ти крепость, слава венчавшему тя, слава Действующему тобою всем исцеления.
Кондак, глас 8
Яко преобидев тленная и долу влекущая мудрования, отче, к вышнему течению радостно устремился еси, и тамо со святыми Пресвятей Троице предстоя, моли от враг сохранитися стаду твоему, яко да святое твое успение празднующе, вопием: радуйся, преблаженне Кирилле, отче наш.
Величание
Ублажаем тя, преподобне отче Кирилле, и чтим святую память твою, наставниче монахов и собеседниче Ангелов.
Молитвы праведному Алексию Московскому
Молитва первая
из акафиста
О всечестный и преблаженный отче наш Алексие, дивный старче Московский и всея Церкве Российския похвало и радование! Велию любовь ко Господу имея, заветы евангельския непреложно исполняя, душу твою за паству полагал еси, сердцем милующим болезнуя о всех, просящих твоея помощи. Приими малое сие моление наше, и яко в земном житии твоем всяку слезу утолял и от всякия скорби избавлял еси, тако и ныне, милосердный молитвенниче и ходатаю наш, возьми тяготы, болезни и скорби наша, исполни страждущая сердца радостию и умоли Человеколюбца Бога о прощении прегрешений наших, да очистив душу покаянием, к добродетельному житию обратимся. Ей, старче Алексие, буди и нам пастырь добрый, на стезю спасения наставляющий, да молитвами твоими безпорочно пройдем путь жития нашего и обрящем Отечество Небесное, идеже ты со Ангелы и всеми святыми предстоиши престолу Святыя Троицы, славяще Безначальнаго Отца со Единородным Его Сыном и Пресвятым, и Благим, и Животворящим Его Духом во веки веков. Аминь.
Молитва вторая
из акафиста
К тебе, о праведный отче Алексие, мы, грешнии и недостойнии, притекаем и со умилением взываем ти: призри ныне милостивно с высоты святыя своея на Отечество наше и нас, тя прославляющих. Приявший в житии своем тяготы людей и сердцем милующим понесый скорби их, приими в молитвенное твое предстательство и нас, грехи многими обремененных и суетою мира сего утружденных.
В тебе, о дивный старче, прославися Господь, явив тя таинником милости Божией. Тя призываем неотступно: буди врач душам и телесем нашим, унывающим утешитель, малодушным дерзновение низпосли, помраченных злобою всепрощению научи, воздержанию способствуй. Воспламени, благий делателю винограда Христова, хладная сердца наша ревностию служения твоего, научи молитве непрестанной и деятельной любве с утеснением себе ради блага ближних наших. Укрепи молитвами твоими чада Церкви нашея, да поживем в любве и мире, а вне ограды церковныя пребывающии да уразумеют Христову истину и вкупе с нами прославят Животворящую и Нераздельную Троицу и твое милостивное предстательство во веки веков. Аминь.