95. Избранней Предвечным Царем Богоотроковице Марии, Ангелов и человеков Царице, пришедшей иногда в храм Господень во Святая святых, на обручение девства Своего Жениху Небесному воспитатеся в Божие Жилище, достойное поклонение усердно Тебе приносим; Ты же, яко многомощная Заступница наша, от всяких нас бед и скорбей свободи, да с любовию и умилением Тебе вопием: радуйся, Богоизбранная Отроковице, вхождением во храм двери райския нам отверзающая.
96. О Всепетая Богоотроковице, пришедшая во храм Господень воспитатися во Святая святых в Божие Жилище, нынешнее наше о всечестнем Введении Твоем приемши приношения, избави нас от всякия скорби и напасти и искушений вражеских, очисти ны от всякия скверны плоти и духа и сохрани нас до скончания нашего в целомудрии и чистоте, да освященнии Тобою достойны будем введения во обители райския с мудрыми девами, с нимиже да воспоем о Тебе Богу: аллилуиа.
97. Избранней в Предвечном Совете Богоотроковице Марии послужити велию таинству Боговоплощения, сияющей девственной чистотою паче высшия небесныя чистоты, благоговейныя пения принесем Тебе, Богородице, о всерадостном от Архангела Благовещении Твоем. Ты же, яко обрадованная и радость падшим людем подати могущая, избави нас от всяких бед и греховныя печали и возведи нас к небесней радости, да с Гавриилом вопием Тебе: радуйся, Благодатная, Господь с Тобою.
98. О Всепетая Параклита Невесто, Чистая брака не познавшая Дево! Архангела красотою девства удивившая и Богу Слову плоть нетленно днесь взаимодавшая, нынешняя наша приемши приношения о всерадостном от Гавриила Благовещении Твоем, Христу Богу обрученныя в девстве сохрани, всех же в чистоте укрепи и от бед избави, да свободшеся Тобою от вечных мук, Тобою рай да обрящем, идеже вси да воспоем о Тебе Богу: аллилуиа.
99. Днесь спасения нашего главизна, и еже от века таинства явление: Сын Божий Сын Девы бывает и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.
100. Возбранных Сил небесных радость и хваление, всего же рода человеча исправление, ублажаем Тя, Пречистая Дево Мати! Ты же наше упование единое, ниспосли душам отраду благодатную, да поем Тебе, образ дивный Твой чтущии: радуйся, Божия Мати, Невесто Нетленная, светлая наша Отрадо.
Сотница четвертая
1. О Всепречистая Дево, Светлая наша Отрадо, Сладчайшего Сына нетленная Мати! От всяких бед и скорбей ограждай нас, от будущих мук нас избави, Благая, радости же вечныя сподоби нас у горняго Престола воспевати: аллилуиа.
2. Яко покров благодатный и спасительный, стяжахом честную Твою икону, Богородице, на сию убо со умилением взирающе, Тебе вопием, Владычице: ниспосли нам отраду и утешение, на Тя бо упование возлагаем, грешнии и смирении, на Твое предстательство надеемся, недостойнии. Ускори нас избавити от бед и скорбей и умоли Сына Твоего, Христа Бога нашего, помиловати и спасти души наша.
3. О Преблагословенная Богородице Дево, поклоняяся Твоему пречистому образу, Тебе поем хвалебную песнь, Тебе приносим свои нужды, горе и слезы. Ты же, о кроткая Заступнице наша, Тебе так близки земныя печали, приими наша воздыхания, помози нам и от бед спаси. Неустанно бо и со умилением зовем Ти: радуйся, Мати Божия, Цвете Неувядаемый.
4. О Неувядаемый Цвете, о Всепетая Мати Марие, рождшая всех святых Святейшее Слово, нынешнее наше приемши приношение, от всякия избави напасти всех и Небеснаго Царствия нас, Царице, сподоби, о Тебе вопиющих: аллилуиа.
5. Радуйся, Богоневесто, жезле тайный, Цвет Неувядаемый процветший, радуйся, Владычице, Еюже радости наполняемся и жизнь наследствуем.
6. Избранная от всех родов Заступнице вселенныя, похвальный глас Твоих рабов приемши, Всеблаженная, избави нас от всяких бед, да пред иконою Твоею и мы архангельский привет поем усердною душею: радуйся, всем радостем Ты еси радость, Всеблаженная.
7. О Мати Всепетая, всем во спасение даждь, Всеблагая, сердец умиление, да Божиим страхом всегда ограждаеми, избегнем губительных сетей борца, и тако Твоими мольбами спасаеми, во веки восхвалим Благаго Творца: аллилуиа.
8. Возбрани врагом нашим озлобляти нас и от Господа нашего отлучити конечне, а нас научи пети Тебе весело: радуйся, Избавительнице, от горя, бед и гибели спасающая нас, бедствующих.
9. О Всепетая и Вселюбимая наша Мати, умилосердися ныне и помилуй, в лютых и безысходных сущих нас скорбех избавляющи, научи нас сердечно воспевати Богу, прощающему нас: аллилуиа.
10. Яко пресветлая звезда, просия Божественными чудесы святый образ Твой, Избавительнице, лучами благодати и милосердия Твоего озарив в нощи скорбей сущих. Подаждь убо и нам, Всеблагая Дево, избавление от бед, исцеление недугов душевных и телесных, спасение и велию милость.
11. Избавление приносящая всем, от сердца Тебе призывающим, принеси избавление скорое и нам, в лютых бедах погибающим и в Тебе Единой избавление наше о Бозе полагающим.
12. Ко иконе Твоей, Пресвятая Госпоже, бедствовавшие с верою притекше заступлением Твоим избавившая от злых! Но яко Матерь Христа Бога, и нас свободи от лютых обстояний временных и вечных, да зовем Ти: радуйся, Избавительнице от всех бед. Аминь.
13. Избранней от всех родов Божией Матери и Царице, милостиво внемлющей молитвам болящих и от водных источников токи целебная изливающей страждущим, благодарственное приносим пение. Ты же, Всемилостивая Целительница, приклонися к благоутробным гласам нашим хвалебным и от всяких недугов душевных и телесных свободи нас, зовущих: радуйся, Живоносный Источниче, вся наша болезни исцеляющая.
14. О Всепетая Мати, Небесная Царице и Владычице, Дево Богородице! Рождшая нам Христа, Сына Божия, изволившаго, нашего ради спасения, снизойти на землю и воплотитися от Духа Свята и от Тебе, Пресвятой Девы, и вочеловечитися; услыши наша усердныя молитвы и всех здесь предстоящих со слезами и воздыханиями молящихся помилуй: даруй нам всем по коегождо прошению помощи, да никтоже от нас отыдет от Твоего Божественного Лика тощ и не услышан, но вси, получивши Твоя милости, благодарственно о Тебе вопием нашему Богу: аллилуиа.
15. Почерпем, человецы, цельбы душам и телом молитвою, Река бо всем предтечет – Пречистая Царице Богородице, источающи нам чудную воду и измывающи сердец черности, греховныя струпы очищающи, души же освящающи верных Божественною благодатию.
16. От неистощимаго Твоего Источника, Богоблагодатная, подаеши ми, точащи, воды Твоея благодати, приснотекущия паче слова, яко бо Слово рождшая паче смысла, молю Тя, ороси мя Твоею благодатию, да зову Ти: радуйся, Водо спасительная.
17. Избранной от всех родов Владычице Богородице, благодатную помощь нам являющей, похвальная восписуем Ти раби Твои, Богородице. Ты же, яко Преблагая Мати Божия, излей на нас великия и богатыя милости Твоя, недуги наша исцели и скорби утоли, да благодарственное зовем Тебе: радуйся,
Владычице, Живоносный Источник верным изливающая.
18. О Всепетая Мати, Живоносный Источник Твой миру давшая, от негоже изливаеши нам великия и богатыя милости, приими благодарственное сие моление наше, даруй нам источник живота нынешнего и грядущаго, да выну зовем Тебе: аллилуиа.
19. Днесь притецем, вернии, к Божественному и цельбоносному образу Пресвятая Богородицы, излиявшия капли Своих излияний и людем верным чудесе показавшия, яже мы видяще и слышаще духовно празднуем и любезно вопием: исцели наши недуги и страсти, якоже и каркинския и тмочисленныя страсти исцелила еси; темже молим Тя, Дево Пречистая, моли воплощеннаго из Тебе Христа Бога нашего спастися душам нашим.
20. Избранней от сложения мира Пресвятей Деве Марии Богородице, яко воистинну плотию рождшей Иисуса Христа, Спаса и Бога нашего, яко Владычице всея вселенныя, зело возлюбившей род преподобных Христа и взявшей под Свой державный покров их святыя обители, похвальная приносим пения; Ты же, о Всечестная наша Мати Игумения, храни, спасай нас от всех врагов видимых и невидимых, да зовем Ти: радуйся, Пресвятая Богородице Дево, Святой Горы Афона и всея вселенныя православных обителей Всечестная Игумения.
21. О Всепетая наша Мати Игумения, Преславная Владычице Богородице, приими сии моления, от всея души Тебе ныне нами возносимыя, и сподоби нас в чине Ангельском достигнути Небеснаго Царствия, идеже вси святии Ангели и человецы воспевают непрестанными гласы хвалу Пресвятей Троице Богу: аллилуиа.
22. Предстательство страшное и непостыдное, не презри, Благая, молитв наших, Всепетая Богородице, Милостивая верных Домостроительнице, утверди православных жительство, спаси страну нашу и всех православно живущих в ней защити, зане родила еси Бога, Едина Благословенная.
23. Избранней от всех родов Царице и Владычице похвальныя песни принесем, яко Ходатаице и Заступнице рода христианскаго. Ты же, яко Благая Предстательница пред Господем, умоли Сына Твоего и Бога нашего даровати нам наследие благ вечных, да радующеся о Тебе взываем: радуйся, Премилосердная Владычице, предстательство наше и всерадостное заступление.